日本寺庙，属于日本临济宗天龙寺派。勒嗨京都市西京区松尾神韹谷町，山号洪隐山，又叫苔寺，本尊是阿弥陀如来。搿个寺本来是圣德太子个别墅。天平年间（729～748），造之四十九院间，勒搿搭造之一间堂宇，安置阿弥陀三尊，号西方寺。建久年间（1190～1199），中原师员归依法然，拿搿个寺分成之西方、秽土两寺，隶属于净土宗。历应二年（1339），摄津亲秀请梦窗疏石为中兴始祖。修整堂舍林泉，改名西芳寺，改属临济宗。永禄十一年（1568），策彦再造伽蓝。后来碰着洪水。明治十一年（1878）开始复兴。搿个寺从中世以来就是以庭园之美而著名。境内四面畀丘陵环绕，风景幽雅宁静。有西来堂、无缝阁、湘南亭、琉璃殿、黄金池、合同船、潭北亭、缩远亭、向上关、指东庵、邀月桥等景。足利义政非常欢喜搿个寺个庭院造型，所以俚造个高仓御所搭东山山庄就是仿造搿个寺个。
